Tá Culture Moves Europe á mhaoiniú ag clár Eoraip na Cruthaitheachta de chuid an Aontais Eorpaigh agus is é Goethe-Institut a chuireann chun feidhme é.
Cé atá in ann iarratas a dhéanamh?
Tá an glao ar iarratais oscailte d’ealaíontóirí agus do ghairmithe cultúrtha ó thíortha rannpháirteacha Eoraip na Cruthaitheachta, atá gníomhach i gceann de na hearnálacha cultúrtha incháilithe: ailtireacht, oidhreacht chultúrtha, dearadh agus dearadh faisin, litríocht, ceol, na taibhealaíona agus na hamharcealaíona.
Cad a chuirimid ar fáil?
Tá trí phríomh-chomhpháirt ar ráta comhréidh sa deontas:
- liúntas taistil
- liúntas laethúil
- aon bhreisiú nó tacaíocht inrochtaineachta is infheidhme (nó an dá rud)
Bunaithe ar an aiseolas ó eagráin roimhe seo, méadaíodh na méideanna uile chun freastal níos fearr ar riachtanais na n-iarratasóirí.
Tacaíocht inrochtaineachta d’iarratasóirí faoi mhíchumas
Rinneadh athbhreithniú ar na coinníollacha d’iarratasóirí atá faoi mhíchumas agus a bhfuil riachtanais inrochtaineachta acu chun é a dhéanamh níos éasca tacaíocht inrochtaineachta a fháil.
Is méid seasta in aghaidh an lae de chur chun feidhme an tionscadail í an tacaíocht inrochtaineachta. Tá sé ceaptha cuidiú leis na costais bhreise a bhaineann leis na riachtanais inrochtaineachta a chumhdach, gan beann ar an méid iarbhír a chaitear. Aithnítear leis an tacaíocht sin gur minic a bhíonn costais bhreise ar dhaoine faoi mhíchumas chun a rannpháirtíocht a dhéanamh indéanta agus inrochtana.
Ina theannta sin, le haghaidh costais bhreise do chúntóir pearsanta nó d’ateangaire comharthaíochta, atá riachtanach chun an tionscadal a chur i gcrích, tá tacaíocht bhreise ar fáil, faoi réir cruthúnas iomchuí.
Cén uair is ceart iarratas a dhéanamh?
Oibríonn na glaonna Culture Moves Europe ar bhonn rollach. Ciallaíonn sé sin go bhfuil spriocdhátaí míosúla ann, le tréimhsí meastóireachta ag deireadh gach míosa le linn na tréimhse iarratais:
Tá an glao seo oscailte ó 1 Deireadh Fómhair 2025 go dtí 30 Aibreán 2026, 23.59 CET (Am Lár na hEorpa).
Beidh 6 mhí ag iarratasóirí ar roghnaíodh a dtionscadal ó dháta sínithe a gcomhaontaithe deontais chun a dtionscadal a chur i gcrích.
